Womex 2009, a música galega a Copenhague
DO 28 DE OUTUBRO AO 1 DE NOVEMBRO
O vindeiro 28 de outubro a capital dinamarquesa colle o relevo de Sevilla como sede de Womex, o encontro de maior relevancia para as músicas de raíz de todo o mundo. A nosa música, por terceiro ano consecutivo, estará presente de novo neste evento grazas á participación das principais empresas do sector. Ademais, entre as iniciativas e estratexias que a delegación galega trasladará a Copenhague para vender a música galega no estranxeiro distribuirase un cd cunha selección de temas dos nosos mellores grupos e solistas e unha guía dos festivais e ciclos musicais máis destacados.
Máis información
Ocultar máis información
A música galega estará presente un ano máis en Womex, a feira de world music máis importante do mundo. Logo de tres anos consecutivos en Sevilla, Copenhague será agora sede da súa próxima edición, que se desenvolverá do 28 de outubro ao 1 de novembro deste ano. O encontro, no que este ano participan 2.800 acreditados procedentes de 90 países, trasládase durante os próximos 3 anos desde Sevilla á capital dinamarquesa.
No Bella Center de Copenhague quedará instalado un amplo stand patrocinado pola Consellería de Cultura e Turismo a través de AGADIC, desde o que se difundirá Galiciantunes, principal marca coa que se vén promocionando nos últimos anos o conxunto da música galega actual no exterior. Tamén desde este espazo se dará cobertura loxística a todas as compañías e empresas desprazadas.
Ademais de material promocional xenérico e do particular que acheguen as diferentes discográficas, a delegación galega distribuirá en Womex 09 un cd de audio cunha selección de temas de grupos galegos, tales como bOnOvO, Fía na roca, Milladoiro, Berrogüetto, Nova Galega de Danza, Rosa Cedrón, Mercedes Peón, Uxía, Fran Pérez & Manecas Costa, Hermanos Moreira, Orquestra Vigo 430, ISGA Collective, Donatore di Groove, Xosé Manuel Budiño, Cristina Pato & Mutenrohi ou Anxo Lorenzo. Tamén se repartirá a guía Galician Festivals, que recolle a listaxe de festivais e ciclos de música galegos máis destacados, elaborada especificamente para a promoción internacional.
As empresas que viaxarán nesta ocasión a Copenhague son Falcatruada, Ouvirmos, Zouma Records, Berrogüetto Producións, Abada, Maré, Articket, Sul Produccións, Nordesía e Xosé Manuel Budiño. As dúas últimas disporán de cadanseu stand exclusivo. Ademais da representación institucional, que encabezará o director da AGADIC, Juan Carlos Fernández Fasero, tamén estarán en Womex representantes das dúas principais asociacións do sector: AGEM (Asociación Galega de Empresas Musicais) e Agaphono (Asociación Galega de Produtoras Musicais), en quen recae a organización da participación galega no evento.
