"Mirabas Almas" é o novo single con videoclip de Rodrigo Ramos, ademais de ser o título do seu primeiro disco en solitario. Unha canción de rock en galego que non che pode deixar indiferente, con clara influencia do rock alternativo dos 90, "Mirabas Almas" flúe nunha mestura perfecta entre as súas guitarras afiadas, a súa melodía desinhibida e o seu pegadizo retrouso que rompe por completo a barreira do idioma.

Enténdese así a elección de "Mirabas Almas" como título do disco, xa que na colección de cancións que conforman o mesmo, este tema é a áncora que dá sentido a todo, unha especie de pararraios que absorbe o impacto que producen no ouvinte os nove cortes restantes.

No videoclip pódense ver imaxes de dous dos concertos da extensa xira de Rodrigo Ramos e a súa banda, neste caso na mítica Sala Karma de Pontevedra e na non menos importante Sala Forum Celticum de Culleredo, dous dos locais referentes da música en directo en Galicia. Realizado por Rafa Ruiz, pode dar unha fidedigna imaxe da intensidade e forza de Rodrigo Ramos e a súa banda en directo, ademais de momentos previos aos concertos que normalmente o público non pode apreciar.