GalicianTunes: Artista - BellónMaceiras Dúo

GALEGO
ESPAÑOL
ENGLISH

BellónMaceiras Dúo

BellónMaceiras Dúo naceu no 2005 da unión musical do gaiteiro Daniel Bellón e o acordeonista Diego Maceiras. O seu profundo coñecemento da música tradicional galega, xunto coas súas inquedanzas artísticas e o seu gusto polas músicas doutros países, fixeron que desde o principio este dúo fusionase sen medo ritmos e melodías de distintos lugares, facendo música do mundo desde Galicia.

O seu primeiro traballo discográfico, "Unión das Terras", foi o premio que gañaron no Teatro Principal de Santiago de Compostela en marzo do 2006. Con este primeiro disco, o dúo xa tocou en Nova York, Xenebra, Varsovia, París, Madrid, Barcelona, Bruxelas, Lorient, Cuxhaven, etc.

No 2007 convidaron a tres músicos a formar parte de BellónMaceiras Quinteto (contrabaixo, batería e guitarra). Esta é, sen dúbida, a característica que mellor define a banda: a fusión de estilos sen complexos e o virtuosismo dos seus compoñentes. "Folkfusión", o disco presentado no 2010 polo quinteto, é definido coma unha nova maneira de entender as músicas do mundo desde Galicia.

O disco "Live au Cornouaille", publicado no verán do 2010, é a gravación do concerto do 60º aniversario do Bagad Kemper (actual campión do mundo das bandas de gaitas bretonas), para o que foron convidados Daniel Bellón, Diego Maceiras e, entre outros, músicos da talla de Dan Ar Braz.

O ano 2011 comezou con concertos de BellónMaceiras en Moscova (Festival de Nadal na Catedral Católica) e en Cosquín (Festival Nacional de Folklore de Cosquín-Arxentina).