GalicianTunes: Artista - Mercedes Peón

GALEGO
ESPAÑOL
ENGLISH

Mercedes Peón

Mercedes Peón está considerada como unha das mulleres máis carismáticas do circuíto da world music actual. Naceu en 1967 e aos 13 anos escoitou cantar a varias mulleres da Costa da Morte. O tocar da pandeireta e o cantar da ribeirana foi o detonante para recoller as cancións, bailes, contos e vivencias dos seus contemporáneos habitantes das aldeas. Transmitiu todo ese coñecemento a través do ensino, nas escolas municipais, na Televisión de Galicia e en universidades como A Sorbona, Porto, País de Gales, etc.

A variedade das súas composicións que arrincan desde a polirritmia baixo a mirada dos ritmos máis ancestrais, culminan en temas eclécticos e descaradamente vibrantes. O seu amplo repertorio, o embruxo e a enerxía que se apodera de cada unha das súas actuacións, fan desta muller, unha aposta segura pola continuidade da escena etnocontemporánea en Europa.

Despois de profundar na tradición durante máis de 25 anos, en 2000 gravou o seu primeiro álbum chamado “Isué”. Nos seus traballos posteriores, “Ajrú” (2004) e “Sihá” en (2007), as súas composicións levárona a unha particular atmosfera casi rozando o electroacústico, que deu como resultado o seu sinal distintivo dentro e fóra das nosas fronteiras. En 2011, publicaba “Sós”, un punto de inflexión onde a artista amosa madurez creativa e máis liberdade que nunca.

O seu último traballo discográfico, “Deixaas” (2018), é unha proposta artística arriscada e atrevida onde Peón amplía o seu universo melódico e visión poética xunto con Mónica de Nut e Ana Fernández.