GalicianTunes: Artista

GALEGO
ESPAÑOL
ENGLISH

Anxo Vigo

Nacín na Coruña nun barrio dos máis emblemáticos da cidade (Monte Alto) recibindo do polifemo xigante, vixilante de ilusións, que é a torre de Hércules, esa forza que imprimo en cada verso das letras das miñas cancións e composicións musicais.

Alá polos anos setenta emigrei á cosmopolita cidade de Londres, para aprender o idioma daquel país, permanecendo na cidade da néboa dez anos. Alí foi onde por primeira vez sentín a nostalxia e a morriña que todos os galegos e as galegas levamos na pel xa cando nacemos, e que sufrimos na alma cando estamos lonxe da nosa terra. Alí entre penas e bágoas, comezou a miña andaina como autor e compositor. Os meus pensamentos dende novo foron sempre en galego, como tamén os meus sentimentos dos que naceron a maior parte das miñas creacións e composicións musicais.

Nas miñas letras prometo chegar ao corazón de todas as galegas e galegos, coa interpretación en cada un dos meus temas de historias da nosa xente e da nosa terra. Son un conxunto de pequenas experiencias e lembranzas, ilusións e sentimentos transformados en canción, coa clara intención de chegar ao corazón de todos os galegos e galegas.