GalicianTunes: Artista

GALEGO
ESPAÑOL
ENGLISH

TRAC

Despois de dous álbums decididamente conceptuais —“Man” e “El bosque sin árboles”— TRAC presenta en 2022 a súa nova obra, titulada "Trac3": máis dunha hora de música espallada por oito pezas que navegan outra vez con liberdade entre as augas do rock progresivo.

O contido principal do álbum vén acoutado polas minisuites ‘El crepúsculo de la doble visión’ e ‘Contrastes’ e, entre elas, corren catro pezas tamén orixinais: ‘Ingravidez’, ‘La hierba cortada’, ‘Liza’ e ‘Rock & Prog’, ás que se xunta a singular reinterpretación desenvolta sobre "El hombre y la tierra" de Antón García Abril.

Como “bonus trac” vai incluído o clásico de Charles Mingus ‘Goodbye Pork Pie Hat’ segundo a versión interpretada no seu tempo por Jeff Beck, que TRAC recupera agora nun tributo a ambos.

O álbum “Man” é unha suite arredor do artista Manfred Gnädinger, o “alemán de Camelle”, desde as súas orixes no Lago Constanza, a súa chegada a terras galegas, a súa obra ao longo de 40 anos en Camelle até a súa tráxica morte cando o desastre do Prestige. O disco "El bosque sin árboles" inclúe temáticas e sonoridades diversas, desde os encadeamentos instrumentais (‘ECM’) á pura introspección (‘Luminarias’) ou á expresión de rabia (‘Generación maldita’), sen esquecer o protagonismo da suite ecolóxica que dá título ao álbum.

TRAC son Moncho Pardo (guitarra eléctrica, efectos, voz), Luis Molina (baixo eléctrico, voz), Berto Morán (batería, percusión, guitarra acústica, voz) e Juan Cordonié (guitarra acústica, eléctrica e sintetizada, voz).