E AS MELÓMANAS FORON PARA...
Por segundo ano consecutivo, os Premios Martín Códax da Música tiveron que celebrarse en outubro pero, a diferenza do ano pasado, esta vez si contaron con público. Organizados por Músicas ao Vivo co apoio da Xunta de Galicia, o Pazo da Cultura de Pontevedra acolleu a Gala dos Premios onde a música compartiu protagonismo co humor, grazas á dirección artística, e magnífica presentación, de Marcos PTT Carballido, quen cumpriu a súa promesa de «facernos rir un pouco nun día de festa».
Na festa da música galega, e baixo a dirección musical de Carmen Rey e Ramón Bermejo coa colaboración de Lucas Rei Ramos e Manuel Abraldes, os asistentes puideron desfrutar dun octeto vocal composto por integrantes de coros galegos como Sisters in the House, Coro Encaixe e Coro da Ra, xunto a Narci Rodríguez, artista da plataforma.
E as melómanas foron para... 🥁
POP E INDIE
A banda da Loba
Perfil en galiciantunes | Entrevista en galiciantunes
ROCK
Moon Cresta
BLUES, FUNK E SOUL
Brais Morán
METAL
N.E.O
CANCIÓN DE AUTOR/A
MJ Pérez
Perfil en galiciantunes | Entrevista en galiciantunes
MÚSICAS URBANAS
WÖYZA
REGGAE, SKA E MESTIZAXE
The Skarnivals
ELECTRÓNICA
Allova
MÚSICA CLÁSICA E CONTEMPORÁNEA
Alberto Vilas (Naialma)
JAZZ E MÚSICAS IMPROVISADAS
María Toro (Fume)
ORQUESTRAS, GRUPOS E MÚSICA DE VERBENA
Bafana Bafana
MÚSICA FOLK
Caamaño & Ameixeiras
MÚSICAS DO MUNDO
Lamas/De Miguel/Romero
MÚSICA INFANTIL
Radio BULEBULE (Paco Nogueiras)
MÚSICA TRADICIONAL
Xurxo Fernandes & Pedro Lamas
Perfil de Xurxo Fernandes en galiciantunes | Entrevista de Xurxo Fernandes en galiciantunes
COROS E GRUPOS VOCAIS
Coro da Ra
BANDAS DE MÚSICA POPULAR
Banda de Música de Chantada
ORGANISTRUM: PROXECTOS DE COMUNICACIÓN E DIFUSIÓN MUSICAL
O Recanto do Corcovado
Nesta edición, e pola difícil situación vivida durante o último ano, as categorías Organistrum correspondentes a Festival e Sala non se someteron ao escrutinio do xurado nin á posterior votación por parte das socias e dos socios de Músicas ao Vivo. Deste xeito, este ano, estas dúas categorías teñen carácter extraordinario e as Melómanas foron concedidas a Jazz de Ría e Mardi Gras, respectivamente.
ORGANISTRUM EXTRAORDINARIO: FESTIVAL
Jazz de Ría
Con cinco edicións ás súas costas, a última o pasado agosto, Jazz de Ría consolídase xa como unha cita imprescindible no circuíto de jazz peninsular. O festival, que se celebra na ría de Ferrol e Mugardos, ofrece múltiples propostas musicais —lembremos que polas súas táboas pasaron grandes como Abe Rábade Trío, Eva Fernández ou Simón García Quartet— ademais de obradoiros de improvisación e actividades infantís. Con produción técnica e escenografía de Luneda Producións, en Jazz de Ría a música comparte protagonismo cos escenarios escollidos para os concertos, que se desenvolven en lugares emblemáticos da zona como a lancha que une Ferrol e Mugardos, o Cantón de Cora mugardés, a Praza Vella, o Baluarte de San Xoán ou o Castillo de San Felipe.
ORGANISTRUM EXTRAORDINARIO: SALA
Mardi Gras
Desde a súa apertura en 1999, a sala Mardi Gras converteuse nunha referencia da música ao vivo non só para nomes consagrados senón tamén para bandas e artistas emerxentes. A sala recuperou a programación este mes de outubro logo de máis dun ano pechada, pero sempre estivo en contacto co sector musical desde o inicio da pandemia, traballando en prol do colectivo. A Mardi Gras foi a impulsora da campaña #ApoyaTuSala e conseguiron recadar fondos para as salas unidas na mesma iniciativa.
PREMIO HONORÍFICO
Pablo Barreiro
Productor, compositor e técnico de son, Pablo Barreiro é o responsable do Arquivo Sonoro da Radio Galega desde 1985. Xeneroso, comprometido e sempre respectuoso cos proxectos que chegan ás súas mans, antes de converterse en productor Barreiro exerceu de músico; primeiro como parte de Cristal Azul, grupo compostelán de principios dos setenta, e despois como compositor de bandas sonoras (Mamasunción, Sempre Xonxa, Mareas Vivas). Á parte técnica chegou logo de darse de conta do mal que soaban algúns dos proxectos nos que estaba como músico e, hoxe, máis de 35 anos despois, con centos de músicos e músicas e milleiros de horas de gravación no seu haber, Pablo Barreiro é considerado unha figura histórica da música en Galicia, sempre pioneiro, abrindo novos camiños.
